29–ئاپرېل ، سۈرىيە ئارمىيەسى بىلەن ئېتىراز بىلدۈرگۈچى ئامما ئوتتۇرىسىدا قاتتىق توقۇنۇش يۈز بەرگەندىن كېيىن ، سۈرىيە ھۆكۈمەت ئارمىيەسى 30–ئاپرېل تېخىمۇ كۆپ تانكا بىلەن دېلا شەھىرىگە كىردى . سۈرىيە زۇڭلىسى ئادىل سافار ھۆكۈمەتنىڭ ئومۇميۈزلۈك ئىسلاھات ئېلىپ بېرىش پىلانىنى تۈزىدىغانلىقىنى جاكارلىدى .

    دېلا سۈرىيە ئارمىيەسى ۋە نامايىشچىلار ئارىسىدىكى توقۇنۇش ئەڭ كۈچلۈك بولغان شەھەرلەرنىڭ بىرى . 25–ئاپرېلدىن بۈگۈنگىچە ، دېلا شەھىرى توك ۋە سۇ توختاش ھالىتىدە تۇرۇۋاتىدۇ . بۇنىڭدىن باشقا ، سۈرىيەنىڭ پايتەختى دەمەشىق ، خاماس قاتارلىق شەھەرلەردىمۇ 29–ئاپرېل زور كۆلەمدىكى ھۆكۈمەتكە قارشى نامايىش ئېلىپ بېرىلدى . خەۋەرلەردىن ئىگىلىنىشىچە ، توقۇنۇش يۈز بېرىپ بۈگۈنگىچە ئاز دېگەندە 560 ئادەم قازا قىلغان .

    ئالدىنقى ئايدا يۈز بەرگەن چوڭ كۆلەمدىكى نامايىشتىن بۇيان ، سۈرىيە ھۆكۈمىتى تۇنجى قېتىم ئاخبارات ۋاستىلىرىنىڭ دەمەشىققە كىرىپ سۈرەتكە ئېلىشىغا رۇخسەت قىلغان .  

    سۈرىيە زۇڭلىسى ئادل سافار 30–ئاپرېل مۇنداق دېدى : پۇقرالارنىڭ تەلىپىگە بىنائەن ، سۈرىيە ھۆكۈمىتى كەلگۈسى بىرنەچچە ھەپتە ئىچىدە ئىسلاھات ئېلىپ بېرىش پىلانىنى تۈزىدۇ .سافار شۇ كۈنى كەچتە ئىچكى كابېنت يىغىنىغا رىياسەتچىلىك قىلىپ ، بۇ تۈردىكى ئومۇميۈزلۈك ئىسلاھات ئېلىپ بېرىش پىلانى سىياسىي ، بىخەتەرلىك، ئەدلىيە ئىسلاھاتى ؛ ئىقتىسادىي ئىسلاھات ۋە ئىجتىمائىي سىياسەت ؛ مەمۇرىي ئىسلاھات ۋە ھۆكۈمەت خىزمىتىدىكى ئىسلاھات قاتارلىقلارنى ئۆز ئىچىگە ئالىدىغانلىقىنى تەكىتلىدى .

    ئۇ مۇنداق دېدى: مەمۇرىي، تېخنىكا ۋە قانۇن قاتارلىق جەھەتلەردىكى مۇتەخەسسىسلەردىن تەشكىل تاپقان ئۈچ كومىتېت ئىسلاھات لايىھەسىنى تۈزۈشكە مەسئۇل بولىدۇ . ئىشچىلار ئۇيۇشمىسى ، خەلق ئىچى تەشكىلاتى ، ھەرقايسى پارتىيە–گۇرۇھلار ۋە جەمئىيەتتىكى ھەرساھە ئىسلاھات ئېلىپ بېرىش لايىھەسىنى مۇھاكىمە قىلىش ۋە تۈزۈشكە قاتنىشىدۇ.

    سۈرىيە ھۆكۈمىتى قارشىلىق ھەرىكەتلىرى يۈز بەرگەندىن بۇيان ، نۆۋەتتىكى ۋەزىيەتنى تىنچلاندۇرۇش ۋە خەلق تۇرمۇشىنى ياخشىلاش ئۈچۈن نۇرغۇنلىغان تەدبىر ۋە قانۇنىي لايىھەلەرنى تۈزدى .

    سۈرىيەدىكى داۋالغۇش ئوتتۇرا شەرق ۋەزىيىتىگە تەسىر كۆرسىتىدۇ

    18–مارتتىن باشلاپ ، سۈرىيە ۋەزىيىتى كۈنسېرى جىددىيلەشتى ، ئامېرىكا بۇ دۆلەتنىڭ ئاخبارات ئورگىنى ۋە ئەمەلدارلىرىغا قارىتا جازالاش ئېلىپ بارىدىغانلىقىنى ئېلان قىلدى . سۈرىيەدىكى داۋالغۇش قانچىلىك تەسىر پەيدا قىلىدۇ ؟ ئوتتۇرا شەرق مەسىلىسى مۇتەخەسسىسى جۇ جاۋيى مۇنداق دەپ تونۇشتۇردى: سۈرىيە مۇھىم تەسىر ۋە ئورۇنغا ئىگە چوڭ ئەرەب دۆلىتى ، بۇ دۆلەت ۋەزىيىتىنىڭ تەرەققىياتى ئوتتۇرا شەرق، ھەتتا پۈتۈن دۇنيانىڭ دىپلوماتىيە ۋەزىيىتىگە تەسىر كۆرسىتىدۇ .

    تېخىمۇ مۇھىمى ، ئامېرىكا سۈرىيە بىلەن بولغان مۇناسىۋىتىنىڭ تەرەققىياتىنى ئوتتۇرا شەرق دىپلوماتىيەسىنىڭ مۇھىم نۇقتىسى قىلىدۇ . بۇ يىل ، يانۋاردا ئامېرىكا سۈرىيەگە يېڭىدىن ئەلچى ئەۋەتتى. بەزى خەۋەرلەردە ئېيتىلىشىچە ، ئامېرىكا سۈرىيە ۋە ئىسرائىلىيە بىلەن سۈلھىلىشىپ ، ئىراننىڭ ئامېرىكىغا بولغان بېسىمىنى يېنىكلىتىشنى ئۈمىد قىلىدىكەن .

    جۇ جاۋيى مۇنداق دېدى : سۈرىيە ئەمەلىيەتتە غەرب دۇنياسى بىلەن ئىران ، ئىراق، لىۋان، پەلەستىن ۋە ئىسرائىلىيە قاتارلىق ئوتتۇرا شەرق دۆلەتلىرى ئوتتۇرىسىدىكى ئىستراتېگىيەلىك مۇھىم دۆلەت ، بۇ دۆلەتنىڭ ۋەزىيىتىنىڭ تەرەققىياتى ئوتتۇرا شەرق رايونلىرىنىڭ ۋەزىيىتىگىلا ئەمەس ، ھەتتا خەلقئارالىق مۇناسىۋەتلەرنىڭ يۆنىلىشىگىمۇ تەسىر كۆرسىتىدۇ.