باش بەت

نۇسرەتگۈل

10601يوللانما
190مەستانە

گېن ئۆزگىرىشى سەۋەبىدىن سۆڭىكى سۇنسىمۇ ئاغرىق ھېس قىلمايدىغان بىر جەمەت كىشىلىرى

مەنبە:بېيجىڭ ۋاقتى تورى يوللانغان ۋاقىت:2017-12-20 20:05 1 ئىنكاس چۈشتى

بېيجىڭ ۋاقتى تورى 19-دېكابىر خەۋىرى، نۇر تورى تەرجىمىسى:

ئىتالىيەدىكى بىر جەمەتتىكى 6 ئادەم بىرەر يېرىنى كۆيدۈرۈۋالسىمۇ، سۆڭىكى سۇنۇپ كەتسىمۇ ئاغرىقنى ھېس قىلمايدۇ. ئەڭ كۈچلۈك بولغاندىمۇ قىسقا ۋاقىت بىر نەرسە سانجىلغاندەك ئاغرىق سېزىدۇ. ئالىملار ئۇلارنىڭ بىر خىل ئۆزگەرگۈچى گېن ئېلىپ يۈرگەنلىكى سەۋەبلىك ئاغرىقنى سەزمەيدىغان بولۇپ قالغانلىقى، بۇ ئارقىلىق سوزۇلما خاراكتېرلىك ئاغرىقلارنى داۋالاشقا يېڭى نىشان بەلگىلەنگەنلىكىنى بىلدۈردى.

ئىتالىيەلىك ئايال لەتىسىيا مارسىل بۇ يىل 52 ياشقا كىردى. ئۇ كىچىكىدىنلا ئاغرىقنى سەزمەيدىغان بولۇپ، بىر قېتىم قار تېيىلغىلى بارغان كۈننىڭ ئەتىسى بارمىقى بىر نەرسە سانجىغاندەك ئاغرىغانلىقى ئۈچۈن دوختۇرخانىغا بارغاندا ئاندىن مۈرىسىنىڭ سۆڭىكى سۇنغانلىقىنى بايقىدى. ئۇنىڭ ئانىسى، ئۇنىڭ ئىككى ئوغلى، بىر ئاچىسى ۋە بىر جيەن قىزىمۇ مۇشۇنداق ئاغرىقنى سەزمەيدۇ. شۇڭا ئالىملار بۇ كېسەلگە شۇلارنىڭ جەمەتىنىڭ ئىسمىنى قويۇپ «مارسىل ئۇنىۋېرسال كېسىلى» دەپ ئاتىدى.

لەتىسىيا ۋە ئۇنىڭ جەمەتىدىكىلەر ئاغرىقنى سەزمەيدىغان بولۇپ قالغانلىقتىن بىرەر يېرى يارىلانسىمۇ ئارام ئېلىپ سالامەتلىكىنى ئەسلىگە كەلتۈرۈش ئېسىگە كەلمىدى. نەتىجىدە سۆڭىكى كۆپ قېتىم سۇندى. لەتىسىيانىڭ 24 ياشلىق ئوغلى بىر پۇتبولچى، ئوشۇقى ناھايىتى ئاجىز. «يېقىندا X نۇرىدا تەكشۈرتكەندە ئۇنىڭ ئىككى ئوشۇقىدىكى خېلى كۆپ ئۇششاق سۆڭىكى سۇنغانلىقى بايقالدى.» ئۇنىڭ 21 ياشلىق ئوغلى موتسىكلىت مىنىپ كېتىۋېتىپ يىقىلىپ چۈشكەندە جەينەك بوغۇمى زەخمىلەنگەنلىكىنى بىلمەي يەنە 15 كىلومېتىر ماڭدى، نەتىجىدە جەينەك سۆڭىكى كالتسىيلىشىپ كەتتى. ئۇنىڭ 78 ياشلىق ئانىسىنىڭ خېلى كۆپ يېرىدىكى سۆڭىكى سۇنغاندا ۋاقتىدا داۋالانمىغانلىقتىن سۆڭەك سۇنغان يەر كالتسىيلىشىپ كەتتى.

بۇ تۈردىكى كىشىلەر يەنە ئىسسىق-سوغۇقنىمۇ ئانچە ھېس قىلالمايدۇ. شۇ سەۋەبتىن لەتىسىيانىڭ ئاچىسى دائىم قىزىق شورپىنى ئىچىۋېلىپ ئاغزىنى كۆيدۈرۈپ قويىدۇ؛ ئانىسىنىڭ بەدىنىنىڭ كۆپ قىسىم جايلىرىدا قايناقسۇ تۆكۈلۈپ كېتىپ كۆيۈپ قالغان يەرلەر بار؛ 16 ياشلىق جيەن قىزىمۇ قولىنى مۇز ئارىسىغا 20 مىنۇت سېلىپ تۇرسىمۇ ھېچقانداق ئاغرىق ھېس قىلمايدۇ.

ئەنگىلىيە لوندون ئۇنىۋېرسىتېتىنىڭ ئىنىستىتوت تەتقىقاتچىسى جەيمېس كوكس لەتىسىيا ۋە ئۇنىڭ ئائىلىسىدىكىلەرنىڭ ئاغرىقنى ھېس قىلماسلىقىدىكى سەۋەب ئۇلارنىڭ بىر قىسىم سەزگۈ ھۈجەيرىلىرىنىڭ كەمچىل بولۇشى ئەمەس، بەلكى ئۇلارنىڭ «نورمال تەرتىپ بويىچە ئىشلىمەسلىكى» ئىكەنلىكىنى بىلدۈردى. تەتقىقاتچىلار بۇلارنىڭ گېن تۈزۈلۈشىنى ئانالىز قىلغاندىن كېيىن ZFHX2 نومۇرلۇق گېنى ئۆزگىرىپ كەتكەنلىكىنى بايقىدى. دۇنيادا مۇشۇنداق گېننى ئېلىپ يۈرگەنلەردىن پەقەت لەتىسىيا ۋە ئۇنىڭ ئائىلىسىدىكىلەرلا بار.

ئالىملار مۇشۇنداق گېنى بار چاشقاننى يېتىشتۈرگەندىن كېيىن ئۇنىڭ تېمىپىراتۇرىغا بولغان ئىنكاسىنىڭ كۆرۈنەرلىك ئاستىلىقىنى بىلدۈردى. تەتقىقاتقا قاتناشقان ئىتالىيە سىيېنا ئۇنىۋېرسىتېتىنىڭ پىروفېسسورى ئاننا مارىيە ئالويېسى بۇ خىل گېن ئۆزگىرىشىنى چوڭقۇرلاپ تەتقىق قىلىشنىڭ سوزۇلما خاراكتېرلىك ئاغرىقلارنى داۋالاشقا يېڭى سەھىپە ئېچىپ بېرىشى مۇمكىنلىكىنى ئېيتتى.

باش سۈرەت تاللاش x
  • تىلفۇن4 ئاي ئىلگىرى

    ئاغىقنى سەزمىسىمۇ بولمايدىغان ئىشكەنغۇ

ﺷﯩﻨﺠﺎﯓ ﺋﯘﻟﯩﻨﯩﺶ ﺗﻮﺭ ﺗﯧﺨﻨﯩﻜﺎ ﭼﻪﻛﻠﯩﻚ ﺷﯩﺮﻛﯩﺘﻰ ﺋﯧﻼﻥ ﺋﺎﻻﻗﻪ ﻧﯘﻣﯘﺭﻯ:13699999340 新疆连线网络有限公司版权所有
ﺗﻪﺷﻜﯩﻠﻰ ﺋﺎﭘﺎﺭﺍﺗﻼﺭ ﺋﯩﺠﺎﺯﻩﺗﻨﺎﻣﯩﺴﻰ : Email : ulinixcn@sina.com | 组织机构代码证:68646203 - 0
新ICP备14001103号-2增值电信业务经营许可证 新B2-20100001号
新公网安备 65010202000070号