بېيجىڭ ۋاقتى تورى 25-دېكابىر خەۋىرى، نۇر تورى تەرجىمىسى:

«مۇستەقىللىق گېزىتى»نىڭ خەۋىرىگە ئاساسلانغاندا، جەنۇبىي ئافرىقىدىكى لۇيىس سىتىيلېم ئىسىملىك 38 ياشلىق دېھقان 5 كۈن ئىلگىرى سىرلىق ھالدا يوقاپ كەتكەن. مۇناسىۋەتلىك ئورۇنلار بۇ مەسىلىنىڭ ھەقىقىتىنى ئېنىقلاش ئۈچۈن دېھقانلار ۋە خەلق ھوقۇقى تەشكىلاتىنىڭ خادىملىرىنى تەشكىللەپ ئىزدەش خىزمىتىگە ئاتلانغان. قۇتقۇزغۇچىلار 5 كۈنلۈك ئىزدەپ، جەنۇبىي ئافرىقىنىڭ ئوتتۇرا قىسىمىدىكى بېسلېھېم بازىرىنىڭ يېقىن ئەتراپىدىكى بىر دېھقانچىلىق مەيدانىدىن لۇيىسنى تاپقان. شۇ ۋاقىتتا ئۇنىڭ بىر چوڭ تاش ئاستىغا قىسىلىپ قالغىنىغا تولۇق 5 كۈن بولغانىدى.

قۇتقۇزغۇچىلارنىڭ ئاشكارىلىشىچە، بۇ 5 كۈن جەريانىدا لۇيىسنىڭ ئاپتوموبىلى ئاۋۋال تېپىلغان بولۇپ، ئۇ قالدۇرغان ئىزلار بىلەن چوڭ تاش ئاستىغا كېلىپ ئۇنى تېپىۋالغان. قۇتقۇزغۇچىلار دەسلەپتە ئۇنى ئۆلۈپ قاپتۇ، دەپ ئويلىغان. بىراق، تەپسىلىي تەكشۈرگەندىن كېيىن ھاياتلىقىنى بايقاپ 3 سائەت تىرىشچانلىق كۆرسىتىپ قۇتقۇزۇۋالغاندىن كېيىن دوختۇرخانىغا ئېلىپ بارغان. لۇيىس ئېغىر دەرىجىدە سۇسىزلىنىپ كەتكەنلىكتىن ھازىر دوختۇرخانىدا يېتىپ داۋالىنىۋاتماقتا.

قۇتقۇزغۇچىلار لۇيىسنىڭ تاش ئاستىدىكى بىر كەمتۈك يەرگە كىرىپ قاپسىلىپ قالغانلىقى، 5 كۈنگىچە سۇ ئىچمەي، ھېچنەرسە يېمەيمۇ ھايات قېلىشىنىڭ بىر مۆجىزە ئىكەنلىكىنى بىلدۈردى. بىراق، ئۇنىڭ تاشنىڭ كەمتۈك يېرىگە نېمىشقا كىرمەكچى بولغانلىقى ھەم نېمە ئۈچۈن قايتىپ چىقالمىغانلىقىنى ھېچكىم بىلەلمىدى.